Ракометарите на Пелистер вечерва на домашен терен ќе го пречекаат унгарски ПИК Сегед (18.45) во осмиот меч сезонава во Лигата на шампионите (ЛШ) во кој ќе пробаат конечно да дојдат до првите бод(ови) во најсилното европско клупско натпреварување.
Шансите за такво нешто реално се мали, со оглед што противникот се уште е во игра за директен пласман во четвртфиналето, со оглед на големата изедначеност во групата и разликата од само два бода помеѓу второпласираниот Алборг и тимот од Унгарија кој е шестопласиран. Битолчани во оваа средба влегуваат засилени со македонскиот репрезентативец, Филип Кузмановски, кој треба да донесе поголема стабилност во играта, а на тренерот Бранислав Ангеловски поголема ротација од квалитетни ракометари.
Зелено-белите од Битола се надеваат дека ќе ја повторат играта од првото полувреме од првиот меч во „Пик Арената“ во Сегед, по кое беа во водство со 19-18, по што следуваше голем пад и убедлив пораз со 26-34.