Пејачката Бритни Спирс (42) објави фотографија на Инстаграм под која тврди дека еднаш го бакнала актерот Бен Афлек (51).
Во објавата, таа сподели фотографија на која е прегрната со Афлек и пејачката Дајан Ворен. Објавата сега е избришана, но „Ти-ем-зи“ успеа да сочува скриншот, којшто можете да го видите тука.
„Убава слика од мене и Бен Афлек и Дајан Ворен пред неколку години! Тој е толку неверојатен актер. Заборавив да напоменам дека го бакнав Бен таа вечер… Искрено заборавив… Тоа е лудо! Само да можев да ви ја раскажам приказната што се случи пред тоа! О, Боже, јас сум озборувачка!“, напишала Спирс во описот, додавајќи неколку емотикони кои се смеат.
Оваа вест ги изненади нејзините обожаватели бидејќи фотографијата е направена во летото 1999 година, период кога и Спирс и Афлек беа во романтични врски со други луѓе. Пејачката тогаш ја почнуваше врската со поп ѕвездата Џастин Тимберлејк, а актерот беше во врска со холивудската ѕвезда Гвинет Палтроу.
Исто така, многумина сметаат дека оваа објава ќе ја вознемири сегашната сопруга на Афлек – Џенифер Лопез.
„Сметам дека ова е знак на непочит кон Џенифер Лопез“, „Бен на времето беше нескротлив, а Бритни е чудна“, „Сѐ што знам е дека Џеј Ло е згодна, а Бен се дружел со секоја слатка актерка и поп ѕвезда, судејќи по ова. Се надевам дека Бенифер 2.0 е добро“, „Џеј Ло ќе ја убие оваа објава“, гласат дел од коментарите на социјалните медиуми.
