По 11 години како стартен возач во Ф1, австралискиот возач со италијанско потекло одлучи да се повлече и претстојнава сезона да биде резервен возач во тимот на Ред Бул Рејсинг.
Возачот на Мекларен, 33-годишниот Даниел Рикардо, нема да го гледаме на патеките во новата 2023 сезона. Тој одлучи да се повлече од активното возење и да стане тест, односно резервен возач во таборот на Ред Бул.
За австралискиот возач тоа значи враќање кај популарените „Бикови“ кои претходно му помогнаа да стигне до Ф1 и со кои ги оствари најголемите успеси во овој спорт.
Како трет возач Рикардо ќе минува повеќе време во симулаторот на Ред Бул во Милтон Кинс, а покрај тоа ќе учествува и во разни маркетиншки и промотивни настани. За време на претставувањето на боите на Ред Бул за 2023 година во Њујорк, Австралиецот најави дека неговото прво гостување на трка во новата сезона ќе биде на Големата награда на Австралија, на крајот на март и почетокот на април.
„Почетокот на сезоната ќе го гледам на телевизија, што ќе ми врати некои спомени. Потоа ќе бидам во Мелбурн, на мојата прва трка откако не сум помеѓу возачите. Ќе ги почувствувам атмосферата, вревата, звуците, мирисот, сѐ одново… Тоа многу ќе ми каже за мојата иднина. Ќе дознаам дали сакам да се вратам, или ќе сакам да бидам навивач, ќе видиме. Мелбурн дефинитивно многу ќе ми каже за мојата иднина“, изјави Рикардо пред новинарите во Њујорк.
Самиот неодамна призна дека одбрал да не се натпреварува во 2023 после двете мачни сезони во Мекларен во кои беше засенет од многу помладиот Ландо Норис. Во составот на британскиот тим Рикардо ќе биде заменет од својот сонародник Оскар Пјастри, кој оваа сезона ќе дебитира во Ф1. Пјастри минатата сезона беше тест возач за Алпин.
[/et_pb_text][/et_pb_column][/et_pb_row][/et_pb_section]
