Ретките птици Такахе, кои важеа за истребени, повторно живеат во дивината на Нов Зеланд

Две птици Такахе, кои како вид се движат по копно и не можат да летаат, беа пуштени во екозасолниште во Нов Зеланд, како дел од најновиот обид да се запре исчезнувањето на едни од најстарите птици во светот, пишува „Би-би-си“.

Двојката птици, Ваитаа и Бендиго, одлетаа од своите кафези и беа поздравени од толпата во природната област Зеландија во Велингтон, Нов Зеланд.

Минатата недела, осумнаесет единки од птицата Такахе беа пуштени во планините на Јужниот Остров, еден од двата главни острова на Нов Зеланд, како обид да се зголеми малата популација во дивината.

Поради предаторите, овие птици биле прогласени за истребени кон крајот на 19. век, но мал дел од нив повторно биле откриени во 1948 година. Нивното повторно откривање на Јужниот Остров поттикна напори за зачувување на овој вид, па сега има околу 500 единки.

Такахе се птици со силен црвен клун, тенки нозе и светло сини и зелени пердуви. Должината на нивното тело, во просек, изнесува 60 сантиметри и можат да тежат до 3 килограми.

Тие се размножуваат само еднаш годишно, а женката несе по едно или две јајца. Тие живеат околу 18 години во дивината, односно 22 години во екозасолништа.

Овие домородни птици еволуирале и се приспособиле за да ги пополнат нишките на екосистемот што би ги заземале цицачите.

Маорите, домородните луѓе на Нов Зеланд, сметаат дека овие птици се богатство што треба да се заштити.

Од одделот за конзервација долго време работат на заштитата на овие птици, а со тоа и на елиминација на нивните предатори, како што се стаорците, феретките и дивите мачки. Неодамна беа инсталирани 45 стапици за феретки и 25 стапици за мачки во дивината, каде што сега беа пуштени птиците.