Македонската пејачка Наташа Крстевска, позната како Мијата, има нова музичка соработка со групата „Фолтин“ од Битола. Имено, станува збор за нивната нова песна „Ме боли“, која е француско-македонска шансона.
Мијата е авторка на музиката и текстот на песната, а аранжманот е дело на пејачката и членовите на групата „Фолтин“. Песната е снимена во студиото „Алшар“ во Скопје.
„Пресреќна сум што постојат врвни уметници како што се „Фолтин“, кои веднаш го разбраа музичкиот филм кој го посакував и создадоа автентична атмосфера поради која оваа песна ќе се смести на листата на препознаени шансони од целиот свет“, вели Мијата.
Песната ќе има и целосна француска верзија со наслов „C’est joli“, а која ќе биде премиерно изведена на „TV5 Monde“, француска телевизија која ги подржува франкофоните ширум светот.
Видеозаписот за песната беше снимен во соработка со универзитетот Европа Прима, каде магистрант е актерката Јелена Мијатовиќ, која направи трансформација за потребите на изведбата, додека Бојан Секулоски, професор на истиот универзитет, ги изработи снимањето, фотографијата, колор корекцијата и монтажата.
