Се одиграа првите натпревари од осминафиналето во Лигата на шампионите на стадионот „Џузепе Меаца“ во Милано и „Ред Бул“ Арената во Лајпциг. Лајпциг пред своите навивачи одигра нерешено 1:1 против Манчестер сити, па така патникот во следната фаза ќе се дознае на 14 март на стадионот „Етихад“.

Англичаните водеа од 27 минута со голот на Марез, а израмнија Германците преку Гвардиол во 70 минута.

Фудбалерите на Интер во финишот минимално го совладаа Порто на домашен терен со 1:0. Човек на одлука беше резервниот играч Лукаку кој влезе во игра од 58 минута како замена за Џеко.

Клучниот момент се случи во 86 минута, Барела одлично центрираше од десната страна, Лукаку шутираше со глава, ја погоди стативата, па се одби топката право во неговата нога, а на Белгиецот не му преостана ништо друго освен да ја затресе противничката мрежа.

Претходно од 78 минута Португалците останаа без еден играч на теренот поради вториот жолт картон на Отавио. Реваншот Порто – Интер е на 14 март на стадионот „Драгао“.