Кејт Буш и Џорџ Мајкл се меѓу уметниците што на годинешната церемонија ќе бидат примени во Куќата на славните на рокенролот, пренесува британски Би-би-си.
На ѕвездите во почесната листа ќе им се придружат иконата на кантри-музиката Вили Нелсон и кантавторката Шерил Кроу.
Уметниците имаат право да влезат во Куќата 25 години по нивниот прв сингл, а рап-иноваторката Миси Елиот направи успех во првата година од подобноста.
Кејт Буш беше номинирана три пати претходно – во 2018, 2021 и во 2022 година.
Иако нема издадено нова музика од 2011 година, таа забележа оживување на популарноста благодарение на својот стар хит Running Up That Hill во популарната драма Stranger Things.
Како што пренесува Си-ен-ен, класата за 2023 година ги вклучува Кејт Буш, Шерил Кроу, Миси Елиот, Џорџ Мајкл, Вили Нелсон, „Рејџ агенст машин“ и „Спинерс“ (како изведувачи).
Диџеј Кул Херц и Линк Вреј ќе бидат добитници на наградата за музичко влијание, а Чака Кан, Ал Купер и Берни Таупин се избрани за наградата за музичка извонредност.
