Зошто и со која цел првиот вицепремиер Артан Груби користи возило кое не е на негово име, зошто опожарениот луксузен автомобил ауди А6 не го пријавил во анкетниот лист,  ќе се иницира ли постaпка за да се провери дали Груби прикрива имот, нема одговор на прашањата што ги упати Телма до Владата и Обвинителството.

Од ДКСК велат дека добиваат дојави за функционери кои не пријавуваат имот, но тоа не можат да го докажат.

И ПОРАНО ИМАВМЕ ДОЈАВИ ЗА ФУНКЦИОНЕРИ ДЕКА ИМААТ И ДРУГ ИМОТ, НО НЕ МОЖЕМЕ ДА ДОКАЖЕМЕ БИДЕЈЌИ ТОЈ ИМОТ Е РЕГИСТРИРАН НА ДРУГО ИМЕ. ЗАТОА СО ГОДИНИ ГО ЗБОРУВАМЕ ИСТОТО, ДЕКА Е ПОТРЕБЕН ЗАКОН ЗА ПОТЕКЛО НА ИМОТ. СЕКОЈ ГРАЃАНИН ДА КАЖЕ ОД КАДЕ МУ Е СТЕКНАТИОТ ИМОТ. ПО ДОНЕСУВАЊЕ НА ЗАКОНОТ НЕКА ИМА ЕДНА ГОДИНА ЗА ИЗЈАСНУВАЊЕ СЕКОЈ ДА КАЖЕ ОД КАДЕ МУ ДОСЕГА  СТЕКНАТИОТ ИМОТ, А ЗА НОВОСТЕКНАТИОТ ДА КАЖЕ ОД КАДЕ МУ СЕ СРЕДСТВАТА. ПОТОА ТОА МОЖЕ ДА СЕ СЛЕДИ ОД УПРАВАТА ЗА ФИНАНСОВА ПОЛИЦИЈА, ВЕЛИ БИЛЈАНА ИВАНОВСКА ОД ДКСК.  

Од ВМРО-ДПМНЕ  побараа Обвинителството да отвори постапка за случајот.

БАРАМЕ ЈО ДА ОТВОРИ ПОСТАПКА ЗА ПРИКРИВАЊЕ НА ИМОТ, ПОТЕНЦИЈАЛНО ДАНОЧНО ЗАТАЈУВАЊЕ И ЗЛОУПОТРЕБА НА СЛУЖБЕНА ПОЛОЖБА И ОВЛАСТУВАЊЕ ПРОТИВ ГРУБИ, КОЈ АВТОМОБИЛОТ, ЗА КОЈ ЦЕЛА ВЛАДАТА  ПОТВРДИ ДЕКА Е НЕГОВ , НЕ ГО ПРИЈАВИЛ ВО СВОЈОТ АНКЕТЕН ЛИСТ  И НЕ ГО ЗАПИШАЛ НА СВОЕ ИМЕ, ПОБРАА ОД ВМРО-ДПМНЕ. 

Од Владата преку соопштение  го осудија чинот на палење на возилото што го користи Груби и  кажаа дека надлежните веќе постапуваат за случајот

СИТЕ НАДЛЕЖНИ ИНСТИТУЦИИ, ИСТРАЖНИТЕ И СУДСКИТЕ ОРГАНИ, ВО РАМКИТЕ НА СВОИТЕ НАДЛЕЖНОСТИ ПОСТАПУВААТ БЕЗ ОДЛАГАЊЕ, ОДЛУЧНО И ПРОФЕСИОНАЛНО СО ЦЕЛ ЦЕЛОСНО РАЗРЕШУВАЊЕ И РАСЧИСТУВАЊЕ НА ОВОЈ СЛУЧАЈ ВО НАЈБРЗ МОЖЕН РОК, ПИШУВА ВО СООПШТЕНИЕТО ОД ВЛАДАТА.

Луксузниот автомобил ауди А6 кој го користи првиот вицепремиер Артан Груби беше опожарен вчера во 3 часот и 30 минути утрото. Полицијата сооошти дека автомобилот е сопственост на лицето Б.Л., а Груби по настанот се огласи на социјалните мрежи, не демантираше дека тој го користел опожарениот автомобил, се извини на соседите и на негвиот пријател, сопственик на возилото, и потврди дека заканата била упатена кон него.

Палењето на возилото на Груби на социјалните мрежи го осудија и министрите Османи и Бектеши, а синоќа се огласи владеачката СДСМ и побара да се откријат мотивите, а сторителите да понесат одговорност. Но, додека медиумите и јавноста бараат одговори, во ниту една од овие реакции нема ниту збор за возилото кое Груби го користи на туѓо име без да го пријави во анкетниот лист.