Пејачката Бритни Спирс, наводно, доживеала нервен слом за време на вечера во ресторан во Лос Анџелес во петокот вечерта, поради што нејзиниот сопруг Сем Асгари го напуштил ресторанот, пишува „Ти-ем-зи“.

Луѓето кои биле присутни велат дека Спирс почнала да се однесува „манијакално“ и дека „изговарала бесмислици“.

Дополнително, многу ја вознемирило тоа што гостите во ресторанот почнале да ја снимаат без нејзина дозвола. На видеоснимката, која ја објави „Ти-ем-зи“, може да се забележи дека Спирс се обидува да си го покрие лицето со мени.

Дел од присутните во ресторанот тврдат дека нејзиниот сопруг бил „видно вознемирен“ и дека излегол од ресторанот без неа. Само две минути подоцна, пејачката сама го напуштила ресторанот, а нејзиниот телохранител ја подмирил сметката.

Портпаролот на Спирс сѐ уште нема одговорено на прашањата во врска со овој случај.

Како потсетување, поп-пејачката долги години се соочува со проблеми поврзани со менталното здравје.

Нејзината состојба ескалираше во 2007 година, кога си ја избричи главата и со чадор ги нападна папараците кои се обидуваа да ја фотографираат. Ова однесување резултираше со 13-годишно легално старателство врз неа од страна на нејзиниот татко Џејми Спирс, кое му беше дадено од судот во 2008 година. Вакво старателство се добива кога некоја личност се смета за непогодна за носење важни лични и финансиски одлуки и секоја промена мора да биде одобрена од судот.

Благодарение на нејзините бројни обожаватели, кои ја покренаа иницијативата #FreeBritney, таа беше ослободена од старателството минатата година.