Портпаролката на Владата, Марија Митева во гостување во емисијата „Ноќно студио“ на 4ТВ, изјави дека ВМРО-ДПМНЕ е подготвено за избори кога и да се одржат, но оцени дека во моментов државниот интерес бара фокус на реформите и инвестициите наместо нов изборен циклус.
Митева рече дека Владата има стабилно парламентарно мнозинство и е посветена на реализација на владината програма и ветувањата дадени пред граѓаните.
„Ако го гледаме нашиот теснополитички интерес како ВМРО-ДПМНЕ, можеби би одлучиле и веќе утре да имаме избори согласно анкетите коишто покажуваат несомнена доверба“, изјави Митева.
Таа додаде дека според неа, предвремени избори би значеле дополнителни трошоци и губење време во година која, како што рече, е важна за реализација на инвестиции и реформи.
Митева упати критики и кон СДСМ, оценувајќи дека опозициската партија се соочува со „идентитетска криза“ и нема јасна визија или кадровска подготвеност.
„Повеќе од очигледно е дека има сериозна паника во однос на делот дали би имало или би немало предвремени избори“, рече Митева.
Таа посочи и дека СДСМ не го поддржал укинувањето на техничката влада и излегувал од работни групи поврзани со реформската агенда, иако јавно се залагал за европска интеграција.
