Двократниот австралиски шампион во двојки на Гренд слем турнирите, Макс Персел, прифати 18-месечна суспензија поради кршење на антидопинг правилата, соопшти во вторникот Меѓународната агенција за интегритет на тенисот (ITIA).
Персел призна дека ги прекршил правилата поврзани со употребата на „забранета метода“ откако несвесно примил интравенска инфузија на витамини над дозволената граница од 100 мл во период од 12 часа и доби привремена суспензија кон средината на декември.
Дванаесеттиот играч во двојки во светот тогаш изјави дека ја информирал клиниката дека е професионален спортист и дека инфузијата мора да биде помала од 100 мл.
„Овој случај не вклучува играч кој е позитивен на забранета супстанца, но покажува дека антидопинг правилата се пошироки од тоа“, изјави извршната директорка на ITIA, Карен Мурхаус.
„Исто така, ова покажува дека ITIA разгледува разузнавачки информации од различни извори со главна цел да ги заштити сите опфатени со антидопинг правилата во тенисот и да обезбеди еднакви услови за сите“, додаде.
Суспензијата завршува на 11 јуни 2026 година, откако ќе се земе предвид веќе отслуженото време.
„Овој случај трае со месеци и сериозно влијае на квалитетот на мојот живот“, напиша Персел на социјалните мрежи.
Персел ќе ги изгуби резултатите и наградниот фонд од датумот на неговото прво кршење на антидопинг правилото на 16 декември 2023 година, па сè до неговиот прв последователен негативен примерок од допинг контрола на 3 февруари 2024 година.
Исто така, ќе му биде забрането да игра, да тренира или да присуствува на какви и да се тениски настани одобрени од членовите на независната ITIA, која беше основана од управните тела на спортот.
Персел, кој ја освои титулата во машки двојки на Вимблдон во 2022 година и на Отвореното првенство на САД минатата година, е најновиот освојувач на Гренд слем турнир кој ги прекрши правилата за допинг.
Четирикратната победничка на Ролан Гарос, Ига Швјонтек, минатата година прифати едномесечна суспензија откако беше позитивна на забранетиот лек „триметазидин“ по контаминација со апчиња за спиење.
Актуелниот светски рекет број еден Јаник Синер беше ослободен од сите обвиненија по два неуспешни теста за анаболниот агент клостебол, но прифати тримесечна суспензија претходно оваа година откако постигна договор со Светската антидопинг агенција.
