Ноќва и утрово се комплетираше четвртфиналната фаза на АТП турнирот во Аделаида, Австралија. Од фаворитите, попушти само Јаник Синер, додека Новак Ѓоковиќ и Данил Медведев си ја оправдаа својата улога и закажаа меѓусебно полуфинале.

Ѓоковиќ беше подобар од Денис Шаповалов, со 2-0 (6-3, 6-4) го скрши отпорот на незгодниот Канаѓанец и се пласира меѓу четирите најдобри. Српскиот тениски ас според планот чекори во Аделаида, каде што е прв носител на увертирата за Австралија Опен.

Како што се очекуваше, Шаповалов пружи солиден отпор, беше близу до брејк на стартот на мечот, меѓутоа откако не успеа стигна казната и Ѓоковиќ со еден одземен сервис дојде до водство (6-3). Во вториот сет Србинот беше поконкретен на стартот, дојде до брејк и предност од 3-1, меѓутоа ривалот врати со иста мера. Сепак, во клучните моменти при 5-4, Ѓоковиќ одново одзеде сервис и зачекори кон победата (6-4). 

Полуфиналните средби во Аделаида се закажани за утре, а во вториот меч ќе се судрат Корда и Нишиока.