Франција е нов светски шампион во женски ракомет откако оваа селекција славеше во големото финале во Хернинг над бранителот на трофејот Норвешка со резултат 31-28. Французинките одиграа извонреден меч пред се на офанзивен план, што им овозможи да се радуваат на обединување на олимписката и на светската круна, како најава за олимпискиот турнир во Париз наредното лето.
Дуелот беше израмнет во голем дел од првото полувреме, Норвешка имаше водство од 5-7, но Французинките успеаја да се вратат, потоа и да го свртат резултатот во своја полза. Норвешка одигра катастрофално во одбраната во тоа прво полувреме, неколку пати имаше негатива од четири гола, за на одмор да се замине со 20-17 за Франција. Јасно беше дека одбраната ќе биде далеку подобра на двете страни, но француските ракометарки успеваа да ја пдржат удобната предност. При 29-25 тие не искористија и зицер за „плус пет“, но по што Норвешка експресно казни и намали на 29-27 на пет минути до крајот. Младата Грандво ја презеде одговорноста кога беше најважно, постигна клучен гол за 31-28, трасирајќи си го патот до златото, во финалето што Франција го доби со конечни 31-28, за четврта светска круна во историјата на оваа селекција.
Грандво и Хорачек со по пет гола беа најефикасни во таборот на новите светски шампионки, по четири погодоци постигнаа Валентини и Канор, додека најрасположена во норвешката селекција беше Офтедал со шест, пред Реистад со пет погодоци.