Поразот од Шпанија во финалето на Светското првенство тешко им падна на аргентинските репрезентативци, а фрустрацијата кулминираше веднаш по последниот судиски свиреж. Наместо спортски поздрав, на теренот настана хаос, откако неколку играчи на Аргентина влегоа во физички конфликти со фудбалерите на новиот светски шампион.
Во метежот беа вклучени голем број играчи од двете селекции, како и членови на стручните штабови. ФИФА веќе потврди дека ги разгледува случувањата и собира докази за да започне официјална дисциплинска постапка. Според најавите, дел од аргентинските претставници би можеле да бидат сериозно казнети поради своето однесување.
Според видеоснимките кои се појавија во јавноста, првиот инцидент го предизвикал Науел Молина. Аргентинскиот десен бек, кој влезе во игра во 58. минута, го удрил Родри во пределот на стомакот додека капитенот на Шпанија, кој претходно беше заменет, славеше со своите соиграчи на теренот.
Родри веднаш побарал објаснување за потегот, а во ситуацијата се вмешал Ерик Гарсија, кој застанал во одбрана на својот соиграч. Тогаш дополнително се зголемила тензијата, откако Леандро Паредес го турнал Гарсија на земја, а потоа го соборил и Гави.
Но, тоа не беше единствениот инцидент по финалето. Набрзо потоа, Роберто Фабијан Ајала, помошникот на селекторот Лионел Скалони, беше обвинет дека го удрил Дани Олмо во пределот на вратот додека шпанскиот репрезентативец го прославуваше историскиот успех.
Сега останува ФИФА да ја заврши истрагата, по што ќе биде познато дали и какви казни ќе следуваат за учесниците во инцидентите.
