Прволигашот од Саудиска Арабија, Ал Наср за кој настапува Кристијано Роналдо би можел да добие специјална покана за настап во Лигата на шампионите во сезоната 2024/25.
Информацијата ја пренесуваат саудиските медиуми и можеби не е целосно точна, но факт е дека тамошните фудбалски авторитети постојано потенцираат дека Ал Наср е најбрзо растечки клуб и веќе во топ-3 според популарноста во светот. Познато е дека од идната сезона се менува форматот на Лигата на шампионите и во неа ќе учествуваат 36, место 32 екипи, а една од оние екипи кои би добиле специјални покани е токму Ал Наср.
Ако ова навистина се случи, УЕФА ќе оди против себе бидејќи пред неколку години жестоко застана против лигата на богатите, наречена Суперлига, па дури бараше и помош од политичките фактори во светот иако постојано потенцира дека не сака политика во фудбалот. За Ал Наср, како еден од најбогатите клубови во светот нема да важи ни финансискиот фер-плеј, па поради тоа за него нема да постојат ни какви било препреки од економска природа.
Освен сето ова, прашање е како УЕФА го избрала токму Ал Наср кој не е ни шампион на Саудиска Арабија, а во моментов има четири бода негатива во однос на лидерот на табелата Ал Хилал.