Американскиот претседател Доналд Трамп му понудил на германскиот канцелар Фридрих Мерц да купи двојно повеќе ракетни системи „патриот“ од првично планираното, со цел да ги даде на Украина, пишува денес американскиот весник „Волстрит џурнал“ (WSJ).
„Во телефонски разговор со Мерц, Трамп му понудил на Берлин да продаде не два, туку пет системи „патриот“. Германскиот лидер веднаш се согласил, иако финансирањето на купувањето треба да го разговара со други европски претставници“, додава весникот, повикувајќи се на добро информирани извори.
WSJ наведува дека телефонскиот разговор се одржал на 11 јули, а во таа пригода шефот на Белата куќа прифатил предлог за користење на германски средства за купување американско оружје за украинските вооружени сили.
Германскиот министер за одбрана Борис Писториус изјави дека ќе бидат потребни месеци за испорака на противвоздушните системи „патриот“ во Киев откако ќе се постигне договор со Вашингтон за нивно купување.
Тој додаде дека двете страни се согласиле да не го наведат точниот број на ракетни системи што ќе ги испорачаат на Украина, објави „Риа новости“. Во понеделник, американскиот претседател ѝ даде на Москва ултиматум од 50 дена барајќи мировен договор со Киев, потсетува руската агенција.
Доколку рокот не се почитува, Трамп се закани дека ќе воведе 100-процентни царини за увоз од Русија, како и секундарни царини за земјите што купуваат руска нафта, гас и други енергетски производи.
Во исто време, Трамп објави дека САД и ЕУ се согласиле да испратат американско оружје во Киев, кое ќе го купат европските земји. Како што објави руската агенција, портпаролот на Кремљ, Дмитриј Песков, рече дека ова се многу сериозни изјави за кои на Русија ѝ треба време да ги анализира. Тој додаде дека претседателот Владимир Путин ќе ги коментира изјавите на Трамп доколку смета дека е потребно.
