Тенките какао-палачинки и нежниот бел крем се редат во висока и впечатлива торта која изгледа како да е купена од слаткарница. Не се пече во рерна, а по неколку часа ладење, секое парче открива совршено наредени чоколадни и кремасти слоеви.
Потребно:
За палачинките:
- 4 јајца
- 500 мл млеко
- 180 г брашно
- 30 г какао
- 80 г шеќер
- 50 г путер
- Прстофат сол
За кремот:
- 500 мл слатка павлака
- 250 г маскарпоне
- 80 г шеќер во прав
- 1 кесичка ванилин шеќер
- Какао за посипување
Подготовка: Јајцата изматете ги со шеќерот и прстофат сол. Додадете го млекото и растопениот путер, а потоа постепено вмешајте ги просеаното брашно и какаото. Мешајте додека не добиете мазна смеса без грутки и оставете ја да отстои околу 20 минути. Во загреана тава печете тенки какао-палачинки и редете ги една врз друга. Оставете ги целосно да се изладат. За кремот, изматете ја добро изладената слатка павлака со шеќерот во прав и ванилиниот шеќер. Додадете го маскарпонето и кратко матете, само додека не добиете мазен и цврст крем. На чинија ставете една палачинка и премачкајте ја со тенок и рамномерен слој крем. Покријте со следната палачинка и повторувајте ја постапката додека не ги потрошите состојките. Завршете со слој крем и посипете со какао. Тортата ставете ја во фрижидер најмалку четири часа, а најдобро преку ноќ, за слоевите убаво да се соединат и тортата да може лесно и уредно да се сече. Палачинките мора целосно да се изладат пред филување. Кремот нанесувајте го во тенки и рамномерни слоеви, бидејќи токму големиот број тенки палачинки и рамномерно распоредениот крем го создаваат атрактивниот слоевит пресек.
