Поранешниот градоначалник на општина Центар, Владимир Тодоровиќ кој што беше во куќен притвор поради инволвираност во случајот „Феникс“ по измените на Кривичниот законик, судот му го укина ова ограничување и сега е потполно на слобода, објави „Призма“.
Македонскиот бизнисмен, кој е основач на ланецот-маркети „Тинекс“ беше приведен во јуни, поради осомниченост дека додека бил на градоначалничката функција ја злоупотребил службената положба и овластување за проектот „Скопје 2014“ во случај што го отвори Јавното обвинителство.
Дел од уапсените завршија во притвор, а за Тодоровиќ тогаш беше донесена одлука да остане во домашен притвор. Тодоровиќ, по предлог на обвинителот, од минатиот петок повеќе не е во куќен притвор.
Дејствијата кои ги стори Тодоровиќ се до 2013, па наместо во 2043, делото целосно му застарува годинава, според најновите измени на кривичниот законик што стапија на сила на 15 септември.
Доколку истрагата биде запрена, Тодоровиќ од судот може да бара да му биде исплатена отштета поради тоа што два и пол месеца неосновано бил во куќен притвор.
