Судиската комисија при Кошаркарската федерација на Македонија се огласи со ново соопштение по повод штрајкот кој го одложува почетокот на домашниот плеј-оф поради долгови за судиски такси.
„Почитувани, со намера да се држиме до аргументите и да ја поштедиме јавноста од долги соопштенија, сакаме да ве запознаеме со следните факти:
Македонските судии и делегати ги имаат најниските судиски такси во цела Европа. Федерацијата и клубовите ни должат над 1.710.000 денари по основ на судиски и делегатски такси и патни трошоци.
Согласно член 44.2 во пропозициите за натпреварување во младинските лиги, односно член 47.2 од Пропозициите за натпреварување во сениорските лиги, рок за исплата на трошоците на службените лица е 48 часа по завршувањето на натпреварот, нешто што е сериозно прекршено како обврска кон нас, како од КФМ така и од клубовите.
Последната уплата од КФМ е извршена на 18.1.2025 година (за Прва лига мажи) и на 1.2.2025 година (за Прва лига жени и Трета лига мажи). Поради ваквата состојба, одржавме состанок на ден 01.04.2025 на кој беа присутни речиси сите членови и донесовме ЗАКЛУЧОК за кој писмено ја известивме канцеларијата на КФМ и засегнатите клубови дека очекуваме исплата до 8.4.2025.
На состанокот беа поканети претседателот на КФМ Перо Антиќ и генералниот секретар Владимир Георгиевски, но не дојдоа. – На ден 08.04.2025 година, откако цела недела не добивме ниту став, ниту уплата од Федерацијата и клубовите, закажавме повторна средба на сите членови на Судиската организација на која дојде само претседателот на КФМ, Перо Антиќ,кој нè запозна со фактичката состојба, ги сослуша нашите ставови и изјави дека ќе ја почитува нашата одлука.
На состанокот кој продолжи зад затворени врати, беше донесена Одлука за престанок на судење и одложување на натпреварите сè до конечна исплата на сите наши побарувања, Делумно или парцијално решение, какво што вчера ни понуди КФМ, не е решение.
За жал, сумата која ја имааат на располагање и која беа подготвени да ја платат, не покрива ниту 40% од вкупните долгови, а не понудија ниту план за исплата на остатокот од долговите“, стои во соопштението на судиската комисија.
Сагата продолжува, а јавноста секако очекува да се надминат овие недоразбирања кои очигледно ја кочат разврската за шампионската титула во домашните првенства.
