Бугарската официјална политика е македонското малцинство да престане да постои, таа е исмејување на системот за заштита на човековите права во Европа и затоа мора да најдеме начин да ги натераме европските институции да се борат против ваквата политика, истакна копретседателот на ОМО „Илинден“ – Пирин, Стојко Стојков, во говор пред Генералното собрание на Европската слободна алијанса(ЕСА/EFA).
Нашата партија, истакна тој, е формирана пред 26 години за борба за правата на македонското малцинство во Бугарија, но само по една година беше забранета.
– Иако Европскиот суд за човекови права одлучи во наша корист, нашата регистрација никогаш не беше вратена. Дваесет и три години функционираме без неа, а тоа е и судбината на бројни македонски невладини организации во Бугарија – и покрај 14 одлуки на Европскиот суд против Бугарија, воопшто немаат регистрирани правни лица или застапници во Бугарија – посочува Стојков.
Тој појаснува дека бугарската официјална политика е, преку асимилација, дискриминација, маргинализација, да направи македонското малцинство да престане да постои.
– А, бидејќи ние даваме отпор, објект сме на омраза и понижување како предавници. Немаме малцински права и не постои функционален правен инструмент во Бугарија за борба против дискриминацијата, а институциите на ЕУ гледаат немоќни. Истиот шовинистички пристап е видлив во ставањето вето од страна на Бугарија против македонската евроинтеграција, инсистирајќи Република Македонија да се согласи дека не постојат такви работи како македонски јазик, историја, традиционална култура и особено да прифати дека во Бугарија нема македонско малцинство – наведува Стојков.
Бугарската политика, како што вели, е поигрување со системот за заштита на човековите права во Европа и Бугарија се залага да се претвори тоа во европска политика.
– Ова е крајно опасно, бидејќи ќе засили многу тоталитарни тенденции во европските држави и ако најде поддршка, може да влијае на малцинствата низ цела ЕУ. Мора да ја подигнеме свеста не само за оваа по природа фашистичка политика на бугарската држава туку и за општата празнина во европскиот систем што го дозволува тоа, давајќи им можност на националните држави да прават што сакаат со малцинствата на своите територии – подвлекува тој.
Мора да најдеме начин, нагласи, да ги поттикнеме европските институции да се борат против таквата политика.
– Потребен ни е суд за правата на граѓаните на Европската Унија, чии одлуки да бидат задолжителни. Не треба да има можност за вето во ЕУ, освен за прашањата за човековите права. И во сето тоа, улогата на ЕСА/EFA беше, е и треба да биде клучна – заклучува копретседателот на ОМО „Илинден“ – Пирин, Стојков.
Слично размислува и потпретседателот на ВМРО-ДПМНЕ, Александар Николоски, според кого, Бугарите се многу гласни за барање човекови права надвор од границите на својата земја, но со години не спроведуваат ниту една пресуда на Судот во Стразбур.
