Овчеполските земјоделци со жив штит, но и со земјоделска механизација го блокираа магистралниот пат Штип – Велес. На протести излегоа, откако минатата недела во неколку наврати побараа вода за наводнување на нивните земјоделски култури.

Овчеполските земјоделци пред неколку дена добија ветување дека ќе добијат вода за наводнување од хидросистемот „Брегалница“, но земјоделците велат дека немаат доволен доток на вода за да ги наводнат своите површини под пченка, детелина, лозја и други земјоделски култури.

Земјоделците од Овче Поле денеска добија поддршка и од оризопроизводителите од кочанско кои се пожалија дека и кај нив полињата буквално горат за вода. Пред два дена поради истиот проблем, протестираа и земјоделците од карбинско. На протестот поддршка дадода и функционери од ВМРО-ДПМНЕ.

Благојчо Богатинов, директор на водостопанство „Брегалница“ за Телма вели дека ветените шест кубици се испорачуваат низ системот, но на терен нема солидарност од земјоделците. Забележана е кражба на водата од земјоделци од Долни Балван, од Крупиште и од Врсаково за што е побрана и интервенција од полицијата.