Италијанските амарети се традиционални колачиња од бадеми и белки, со богат оревест вкус и совршена комбинација на текстури – однадвор крцкави, а одвнатре густи и меки. Се прават од едноставно тесто со снег од белки, бадемово брашно и шеќер, а аромата се засилува со кора од лимон и малку екстракт од бадем
За домашни амарети ви требаат само пет состојки, десетина минути мешање и обликување, и малку трпение додека се печат. Порано се правеле со горки бадеми (од каде и името), па можете да пробате и верзија со екстракт од горчлив бадем, а честопати се додава и малку ликер Амарето. Можете да ги послужите со Амарето, со десертни вина или едноставно со кафе или чај.
Амаретите потекнуваат од северна Италија, особено од регионите Ломбардија и Пијемонт. Во 18. век станале омилена деликатес и надвор од Италија – ги обожувале европските благородници, а биле задолжителен дел од кралски вечери и аристократски собири.
Состојки за амарети:
• 240 г бадемово брашно;
• 200 г шеќер;
• Кора од 1 лимон (рендана);
• 3 белки;
• 1 лажичка екстракт од бадем;
• Шеќер во прав (по желба);
• Цели бадеми за украс (по желба);
Подготовка:
Загрејте ја рерната на 160 степени и обложете плех со хартија за печење.
Во еден сад измешајте бадемово брашно, шеќер и рендана кора од лимон. Во друг сад изматете ги белките во цврст снег, па додадете го екстрактот од бадем. Полека измешајте ги белките со сувите состојки и ќе добиете лепливо тесто.
Со лажица земајте тесто и формирајте топчиња. По желба, на врвот притиснете цел бадем. Наредете ги топчињата во плех со растојание меѓу нив бидејќи ќе се рашират при печење.
Печете ги 20–25 минути или додека не добијат златно-кафена боја.
По желба посипете ги со шеќер во прав.
