Никол Артуковиќ, Американка со хрватски корени и Лиам Стјуарт, син на легендарниот музичар Род Стјуарт, се венчаа минатиот викенд во Дубровник. Нивната венчавка ја пренесоа бројни регионални и странски медиуми.
Сега Никол на својот инстаграм-профил сподели фотографии од венчавката.
„Г-дин и г-ѓа Стјуарт. Нашата свадба од бајките, сега живееме среќно до крајот на животот“, напишала Никол покрај фотографиите и им се заблагодарила на сите кои учествувале во организацијата на венчавката.

Целото нивно семејство пристигна во Хрватска, вклучувајќи ги Род, неговата поранешна сопруга Рејчел Хантер и сегашната сопруга Пени Ланкастер.

Парот се венча во дубровничката црква Св. Игнатиј кај Језуитите, а забавата била организирана во тврдината Ловриенац.

„Неверојатно сум горд што бев на прекрасната свадба на мојот син Лиам и неговата невеста Никол“, напиша Род Стјуарт на социјалните мрежи и додаде:
„Колку убава заедница на Стјуарт и Артуковиќ! Нека продолжат заедно да ја наоѓаат среќата, љубовта и смеата додека се живи и нека прават уште бебиња да му се придружат на нивниот едногодишен син Луи.“