Семејната фирма на директорот на Службата за општи и заеднички работи, Ивица Томовски која го менувала името, добила вкупно 161 тендер, вредни речиси 5,5 милиони евра, пари на граѓаните, објави на прес-конференција генералниот секретар на СДСМ Александар Димитриевиќ, откако партијата најави серијал на корупциски скандали за власта под наслов „Бомби 2.0“.
– Семејната фирма на Томовски ја зголемила својата деловна дејност за 306%!!! И тоа само во 2024 година. Случајно, им тргнало чистењето на буџетот.“ Во тековната 2025 година, истата фирма веќе добила нови 10 тендери од речиси половина милион евра. Сопственик на Сити логистик во моментот кога е основана е Витомир Томовски од Струга, татко на Ивица Томовски, а управител Слободан Кутановски, нивни близок роднина. Потоа се менува името на фирмата – Сити аутсорсинг. Иста адреса, ист единствен матичен број на субјект, само со друго име. Од државни институции и од општини, водени од ДПМНЕ, семејната фирма на Томовски која го менува името добила: неверојатни 5 милиони и 360 илјади евра или вкупно 161 тендери. Тоа се речиси 5,5 милиони евра! Пари на граѓаните! – изјави Димитријевиќ.
Опозициската СДСМ ја обвинува власта за наместени тендери преку блиски луѓе и посредници.
Директорот на Службата за општи и заеднички работи (СОЗР), Ивица Томовски, најави дека ќе поднесе тужба против СДСМ ако партијата не се извини за обвинувањата дека негова семејна фирма од државни институции и општини водени од ВМРО-ДПМНЕ добила вкупно 161 тендер во вредност од 5,3 милиони евра.
Томовски вели дека посочената компанија не е негова, ниту, пак, дека има каков било удел во неа.
„Јас во моментов немам никаква приватна компанија и единствено сум насочен кон мојата работа како директор на СОЗР. Целиот мој живот работам чесно, одговорно и посветено, така и ќе продолжам. Слободно сите можни институции да проверат сè, а искрено од СДСМ не очекувам извинување затоа што за извинување потребна е доблест и морал, а тоа одамна видовме дека го немаат“,пишува Томовски во реакцијата објавена на Фејсбук.
Наводите на СДСМ ги оцени за малициозни и полни со клевети и измислици.
„Тоа е нивниот стил, но и единствената сламка за спас. Додека зборуваат за некаков криминал, тие што вистински се тоа, од Дубаи нарачуваат и пишуваат клеветнички прес-конференции. Така тоа изгледа кога крадецот вели ‘држете го крадецот’. И сакаат да се заборави на златните визи на Филипче, Заев, за модуларната болница, Соравија, плантажите за марихуана. Тоа беше нивното ‘владеење’ – период на пропаѓање што остави длабоки последици врз општеството и врз довербата во институциите“,вели Томовски.
