Русија утринава нападна градови низ Украина со стотици беспилотни летала и десетици ракети, при што загинаа најмалку 18 лица, а повеќе од 100 беа повредени, според локалните власти.
Нападите врз градовите, вклучувајќи ги Киев и Днепар, следеа по руските предупредувања за „систематски“ напади врз главниот град по смртоносниот напад со беспилотно летало врз студентски дом во регионот Луганск во Украина, кој е под руска контрола, минатиот месец, за кој Киев негира одговорност.
Ова е трет силен напад врз Киев за помалку од еден месец. Русија ги засилува нападите врз Украина додека Вашингтон е фокусиран на Иран, а мировните преговори со посредство на Вашингтон се во застој.
Украинскиот претседател Володимир Зеленски објави дека Русија испалила 73 ракети и повеќе од 600 беспилотни летала во нападот. Тој повторно го повика Вашингтон да испрати дополнителни пресретнувачи за системот Патриот за да ги надополни залихите на Киев.
„Ова беше напад од големи размери и апсолутно јасна порака од Русија – ако Украина не биде заштитена од балистички и други ракетни напади, нападите ќе продолжат“, напиша тој на Телеграм.
Кремљ во вторник објави „нова парадигма“ на војна поради она што го нарече „нехумани акти на тероризам“ од страна на украинската војска против цивили.
„Ако режимот во Киев свесно изврши такви нехумани… терористички акти против цивили, против деца, тогаш тоа е сосема поинаква парадигма“, рече Песков, портпарол на Кремљ.
Москва најави напади и ги повика странците да го напуштат Киев.
Минатата недела, Зеленски испрати писмо до американскиот претседател Доналд Трамп и Конгресот барајќи системи за воздушна одбрана.
Тој не доби одговор до понеделник, пишува Ројтерс.
