„Мел Гибсон пристигна во Сараево на преговори околу снимањето на филмот и веднаш отиде на ќебапи“ – вака гласеа повеќето од вестите што вчера ги пренесоа бројни регионални портали.
На оваа вест „кумуваше“ една објава на страницата на Инстаграм на тамошниот ресторан Брајловиќ – на фотографијата се гледа персоналот на ресторанот во друштво со „холивудска ѕвезда“.
„Во друштво со најголемата ‘фаца’ на Холивуд. Преговори за снимање на акционен сет кај нас, а Сејо (сопственикот на ресторанот) игра споредна улога. Останатите сè уште сме статисти и акробати. П.С. Само хејтерите ќе кажат дека ова е фотомонтажа и двојник“, пишува под фотографијата.
Беше јасно дека се работи за човек кој донекаде наликува на Гибсон, но дека не може да биде вистинска холивудска ѕвезда.
Сепак, некои паднаа во стапицата, а ресторанот доби бесплатна реклама и покажа маркетиншки вештини.
Дури и следбениците веднаш забележале за што се работи.
„Ако ова е Мел Гибсон, јас сум Бред Пит“, гласи еден коментар.
