Со денешниот дуел против Мароко (од 18 часот), Македонија ќе ја затвори втората групна фаза, во т.н. Президент куп на Светското првенство за ракометари. Од мечот ќе зависи дали ќе го освоиме третото или второто место во групата во Плоцк, што, пак, ќе нè насочи кон финална пресметка за пласман на 27. или на 29. место.
Ретко кој пред првенството претпоставуваше дека ќе правиме математики за да не бидеме пласирани на 30. позиција во конечното рангирање, но реалноста се сведе на тоа. Барем, математиката е едноставна, потребно ни е да не загубиме денеска против Мароканците и со тоа ќе се квалификуваме за дуел против Јужна Кореја, в среда, за 27. позиција. Пораз ќе значи дуел со Саудиска Арабија, за да го избегнеме 30. место.
Мароко е репрезентацијата која прва доживеа изненадување на овој Мундијал, со поразот од САД во првото коло. Меѓутоа, оттогаш наваму и не покааж баш дека тој пораз бил незаслужен, бидејќи губеше двоцифрено и од Египет и од Хрватска во прелиминарната група, а потоа настрада од Тунис со 25-30. Во мечот со Алжир, речиси 59 минути изгледаше дека ќе наниже уште еден пораз, но со три гола за 80 секунди си заработи премиерен триумф на овој собир.
Колку и да делува дека е под нашето ниво, Мароко е бронзената селекција од последното Африканско првенство, која, за да го заработи тој трофеј, го совлада истиов овој Тунис (28-24) и сето тоа се случуваше пред точно пола година. Има шестмина ракометари во составот, кои играат во Франција, но само двајца во првата лига, во Трембле.
Македонија досега не се соочувала со овој ривал на Светските првенства.
[/et_pb_text][/et_pb_column][/et_pb_row][/et_pb_section]
