Фаворитите за највисок пласман сезонава во Лигата на шампионите, со победи ја отворија „кампањата“. ПСЖ, Ливерпул и Баерн на домашен, а Интер на гостински терен славеа триумфи.
Актуелниот шампион Париз Сен Жермен беше најубедлив и со четири гола во мрежата ја испрати Аталанта за Италија. Три гола постигна и минхенски Баерн кој на „Алијанц“ арената го пречека лондонски Челзи. Два гола за Баварците постигна Хари Кејн.
Интересен дуел се одигра на „Енфилд“ каде англискиот првак Ливерпул славеше против Мадридски Атлетико со 3-2. Ливерпул имаше водство од 2-0 по само шест минути игра. Сепак Атлетико преку Љоренте стигна до израмнување. За радост на домаќините се погрижи Ван Дајк со погодокот во втората минута од судиското дополнение (90+2).
Италијанскиот вицешампион Интер славеше на гостувањетово Амстердам каде беше подобар од Ајакс и тоа благодарение на двата гола на Французинот, Турам.
Кипарскиот фудбалски клуб Пафос денес одигра без голови на гостувањето кај Олимпијакос, на деби настапот на клубот во елитното натпреварување. Интересно е што Кипарците стигнаа до Лигата на шампионите само 11 години од нивното формирање, што е одличен успех сам по себе.
“Сите беа во екстаза”, изјави поранешниот дефанзивец на Бразил и Челси, Давид Луиз, кој се приклучи на тимот ова лето. “Сите беа апсолутно среќни, затоа што направивме нешто неверојатно. Никој не очекуваше дека ние ќе бидеме во Лигата на шампионите”.
Пафос остана со играч помалку уште во 25-та минута, кога Бруно Фелипе беше исклучен со втор жолт картон. Тоа значеше дека целиот натпревар ќе мораат да го издржат со еден човек помалку. Дополнително, Олимпијакос доби шанса да има и самиот црвен картон кога Мехди Тареми беше исклучен во второто полувреме, но по преглед на ВАР одлуката беше поништена и Грците сепак останаа со 11 играчи. Сепак, Пафос со голема борбеност стигна до историски бод.
Погледнете ги најинтересните моменти на дебито на Пафос против Олимпијакос.
Во Прага, атмосферата беше далеку подраматична. Славија поведе со 2:0 благодарение на двата гола на Јусуфа Мбоџи (23’ и 74’), а претходно норвешкиот тим на Бодо/Глимт имаше промашен пенал преку Каспер Хог. Се чинеше дека домаќините сигурно чекорат кон победа, но Бодо покажа неверојатен карактер.
Најпрво Даниел Баси намали на 2:1 во 78-та минута, а во самиот финиш Сондре Фет со спектакуларен волеј кој од пречката влезе во голот израмни на 2:2. Следуваше над 11 минути судиско продолжение, но голманот Никита Хајкин беше ѕвезда на теренот и со неколку одбрани му донесе на Бодо бод вреден злато.
Со овие резултати, двата дебитанти во Лигата на шампионите испратија јасна порака дека нема да бидат лесни противници, дури и кога изгледаат на работ на пораз.
ЛИГА НА ШАМПИОНИ – 1. КОЛО
СРЕДА
ПСЖ – АТАЛАНТА 4-0
ЛИВЕРПУЛ – АТЛЕТИКО МАДРИД 3-2
БАЕРН МИНХЕН – ЧЕЛЗИ 3-1
АЈАКС – ИНТЕР 0-2
ОЛИМПИЈАКОС – ПАФОС 0-0
СЛАВИЈА ПРАГА – БОДО ГЛИМТ 2-2
