Американските власти ја продолжија потрагата по британскиот актер Џулијан Сендс, кој исчезна минатиот петок во текот на планинарење во Калифорнија.

Потрагата на терен е одложена во претходните денови поради лошите временски услови.

Британскиот актер последен пат е виден пред една недела во планинскиот венец Сан Габриел, кој се наоѓа северно од Лос Анџелес.

Полицијата соопшти дека го пронашла неговиот автомобил во близина на местото каде што бил пријавен за исчезнат.

– Оттогаш нема нови информации или информации од сведоци за тоа каде се наоѓа – изјави за Би-Би-Си Глорија Хуерта од канцеларијата на шерифот во Сан Бернардино.

Сендс исчезна по неколкунеделните смртоносни бури што ја зафатија Калифорнија, што го натера американскиот претседател Џо Бајден да прогласи вонредна состојба.

Потрага по уште еден планинар

Полицијата соопшти дека одговорила на 14 повици од планината Сан Антонио, локално позната како планината Балди, во изминатите четири недели и ги предупредила посетителите „да се држат настрана“ од областа.

– Исклучително е опасно, па дури и искусните планинари влегуваат во неволја – соопштија од полицијата.

Тие бараат и друг планинар, Американец, кој исчезнал во истите планини.

Минатата недела мајка на четири деца, која пријателите ја опишаа како искусен планинар, почина откако се лизна повеќе од 500 метри по планината Балди.

Сендс глуми во филмови и серии, вклучувајќи ги „24“, „Smallville“ и „A Room With a View“. Познат е и по главната улога во филмот „Хелен во кутија“.

Тој живее во Лос Анџелес од 2020 година, а неодамна се појави во драмата „Benediction“ со колегата Питер Капалди. Има три деца и живее во Лос Анџелес со сопругата, писателката Евгенија Читковиќ.

Колегите актери се огласија на социјалните мрежи за да изразат загриженост за благосостојбата на Сендс, а неговото семејство им помогна на властите во потрагата.