Основното јавно обвинителство (ОЈО) Куманово побара, а судот прифати ѝ и определи мерка притвор на 41-годишната кратовчанка која е осомничена за спречување полицајаци во вршење службено дејствие како и за узурпација на локалитетот Куклица, соопшти Јавното обвинителство. Според обвинителството осомничената со години незаконски им наплаќала влез на посетителите на споменикот на природата, а при последната интервенција физички ги нападнала полицајците.
Како што информираше Обвинителството, осомничената подолг временски период, и покрај претходно преземените мерки од надлежните институции, продолжила незаконски да го узурпира локалитетот Куклица, кој со указ е прогласен за споменик на природата.
Таа, како што се наведува, без правна основа им наплаќала влезници на посетителите, се расправала со нив и им упатувала закани, со што континуирано го нарушувала јавниот ред и мир.
„При последниот инцидент осомничената презела и дејствија на кривично дело спречување службено лице во вршење службено дејствие, односно физички ги нападнала и спречила полициските службеници кои се обиделе да ја легитимираат и да ја приведат. Јавниот обвинител го имаше предвид и фактот дека против ова лице веќе е во тек постапка за продолжено кривично дело узурпација на локалитетот Куклица, во која и се изречени мерки на претпазливост, вклучувајќи и забрана да ја посетува локацијата, меѓутоа таа одбегнува да го прими и почитува решението.
Исто така, осомничената заедно со нејзиниот сопруг и претходно учествувала во дејствија на спречување службено лице во вршење службено дејствие кон пазарни инспектори“, се наведува во соопштението на Јавното обвинителство.
Оттаму дополнуваат дека поради опасност од бегство, како и поради околностите што укажуваат дека осомничената би можела да продолжи со вршење кривични дела, јавниот обвинител предложил определување мерка притвор, а судот го прифатил предлогот и донел решение за определување притвор.
