Принцот Хари за време на интервјуто за „Гуд морнинг Америка“ изјави дека го сака своето семејство и дека се надева по дијагнозата на рак на неговиот татко повторно ќе се обединат сите. Потоа, се појави веста дека би сакал да му помогне на своето семејство во овие тешки моменти, односно би ја прифатил поканата повторно да преземе должности во британското кралско семејство.
Меѓутоа, како што пишува британски „Телеграф“ нема враќање назад во кралското семејство за војводата од Сасекс, за да преземе привремена работна улога додека неговиот татко е болен.
Условите на „Самитот во Сандрингем“, како што е договорено меѓу војводата и неговата покојна баба, татко и брат, сè уште стојат. Хари се откажа од должностите како активен член на кралското семејство и се обврза да не ја користи својата титула за комерцијални цели.
„Тие услови беа сосема јасни, а болеста на кралот не го промени тоа“, изјавил извор близок до семејството.
Инаку, неодамна Хари беше во Велика Британија без Меган Маркл и таму помина само еден ден. Тој се состана со кралот само 45 минути, а не се сретна со својот брат, принцот Вилијам, со кој има многу заладени односи.
