Не се доволни досегашните мерки кои ги преземаат надлежните за да се намали загадувањето на воздухот, тврдат екологистите. Токсичниот воздух во Скопје и другите градови ќе се дише уште долго време, ако не се направат похрабри чекори.
Додека граѓаните повторно на отворено ги вратија маските и не ги отвораат прозорците за миризбата да не влезе во нивните домовите, продолжува расправијата на релација власт – опозиција. СДСМ обвинува дека загадениот возух е резултат од кавгите на Арсовска и ДПМНЕ за тендери и провизии, а за реалните проблеми на граѓаните не направиле ништо.
„Факт е дека локалната власт на ВМРО-ДПМНЕ и нивната коалиција во Скопје со Левица и Арсовска не преземаат ништо за да го решат овој проблем. Аерозагадувањето е најголемиот причинител на зголемен број на заболувања кај луѓето и предвремена смртност. Всушност, ова е резултатот од незаинтересираноста на Арсовска и ДПМНЕ за граѓаните на Скопје“, обвинуваат од СДСМ.
Советниците на СДСМ во град Скопје побараа вонредна седница и предложија неколку мерки, меѓу кои бесплатен јавен превоз, миење на улиците, план за чистење на депониите…Но, од ВМРО ДПМНЕ не сметаат дека треба да има вонредна седница во градот. И тие прстот го вперија во владејачката партија.
„СДС е централна власт 7 години, и за целиот тој период нема направено ниту една инвестиција, со која би се намалило загадувањето на воздухот. Ковачевски и Арсовска се договараат за тендери, но не можат да се договорат да одвојат средства за намалување на загадувањето на воздухот“, реагираат од ВМРО-ДПМНЕ.
Додека почитичките партии се препукуваат од Арсовска и натаму молк за горливиот проблем на скопјани. Појавувањата пред јавноста остануваат протоколарни, исто како и изјавите.
Скопје и денеска е 15 пати загаден над дозволеното со 78,2 микрограми на метар кубен PM 2, 5 честички.
