Со наближувањето на одморите, се врати хаосот пред шалтерите на МВР за нови пасоши. Граѓаните се револтирани. Велат дека се принудени да го откажат годишниот одмор поради чекање и до три месеци за редовно да ги добијат пасошите. Во меѓувреме, некои други за да го решат ова чекање, го избраа брзиот начин за да го добијат овој патен документ.
„Два и пол месеци откако аплицирав, а новиот пасош сè уште не е готов. Каков одговор добивте? Ми рекоа да проверам дали е во станицата Беко бидејќи таму го доставив. Дали ви ја кажаа причината зошто толку доцнат? Секој наоѓа причина за да излезе од ситуација. Не е во ред да чекаш два-три месеци за пасош…“
„Го избрав редовниот начин пат бидејќи не ми требаше затоа што за среќа синот има две државјанства, белгиско и македонско и не брзаме“, рекоа граѓаните.
Од МВР не добивме одговор која е причината зошто се чека и до три месеци за добивање пасоши, но нè информираа дека досега над 1 милион 490 илјади граѓани се фотографирале за пасоши со новото име на државата, за лична карта 1.245.286 граѓани, а за возачка дозвола 646.989.
