Иранската полиција за морал ќе продолжи со патролите за да ги натера жените да се придржуваат до строгите исламски правила за облекување, објавија државните медиуми во неделата, 10 месеци откако смртта на една млада жена во притвор предизвика протести низ целата земја.

Саид Монтазералмахди, спикер на овој орган, рече дека полицијата повторно ќе започне со патролите со возила и пешаци низ земјата од недела, објави државната новинска агенција Фарс.

„Службениците прво ќе ги предупредат жените кои не ги почитуваат правилата, додека оние кои инсистираат да ги прекршат нормите, може да се соочат со правни мерки“, рече тој.

Полицијата за морал стана позната во меѓународната сцена во септември минатата година, кога 22-годишната Махса Амини почина три дена откако беше уапсена од страна на силите за неправилно носење на нејзиниот хиџаб и одведена во центар за „превоспитување“.

Нејзината смрт предизвика национални протести кои ја потресоа земјата, претставувајќи една од најголемите домашни закани за владејачкиот свештенички режим во Иран во повеќе од една деценија.

Властите реагираа насилно за да го потиснат повеќемесечното движење, за време на кое сведоците рекоа дека полицијата за морал практично исчезнала од улиците на Техеран.

Убиени се најмалку 582 лица од страна на режимот во Иран минатата година, што е зголемување од 75 отсто во однос на 2021 година, според групите за човекови права кои велат дека порастот ги одразува напорите на Техеран да внесе страв меѓу демонстрантите против режимот.

Полицијата за морал има пристап до моќ, оружје и центри за притвор и контрола врз центрите за превоспитување, изјави за CNN минатата година Human Rights Watch. Групата е санкционирана од САД и Европската Унија.

Центрите делуваат како установи за притвор, каде што жените, а понекогаш и мажите се приведуваат затоа што не ги почитуваат државните правила за скромност.

Внатре во објектите, на затворениците им се даваат часови за исламот и важноста на хиџабот и се принудени да потпишат ветување дека ќе ги почитуваат државните прописи за облека пред да бидат ослободени.