Дарко Панчев е најдобро име кое може да направи најава за еден натпревар меѓу Интер и Црвена Звезда, од едноставна причина што прославениот македонски голгетер ги бранеше боите на двата клуба.
После сите големи успеси кои ги оствари со српскиот великан, Панчев направи трансфер во Интер и ја направи најголемата грешка во животот, па во интервјуто кое го објави порталот „internews“, популарната „Кобра“ покрај најавата за вечерашниот меч, говори и лошото искуство кое го имаше во Италија.
Панчев на познатиот медиум откри дека добил директен и јасен совет од легендарниот Матијас Замер во својата почетна етапа во клубот, кој за жал не можел да го разбере во тој момент.
– Имам измешани емоции од моите почетоци во Интер. Прво и основно, презентацијата пред илјадници фнаови беше величествена, тоа се случи во центарот на Милано. Добредојде достојно за играч кој во сезоната 90/91 беше „Сребрена топка“, „Златна копачка“ и најдобар стрелец во квалификациите за Европското првенство. Во поранешна Југославија освоив двојна круна со Црвена Звезда, станав европски и светски шампион, бев фит и полн со самодоверба….
– Почетниот третман кој го добив во Интер ми прилегаше, на првите два меча постигнав пет гола во Купот и се изгледаше како бајка. Сепак, еден месец по првиот дел од сезоната во Италија, во соблекувалната имаше студен туш. Легендарниот Матијас Замер ми пријде и ми се обрати директно на германски: Дарко, тука нема фудбал, оди си! Бев шокиран од неговото размислување, но тој набрзо си ги спакува куферите и го напушти клубот. Не го послушав неговиот совет, бев доста тврдоглав. Тој добро ја прочита ситуацијата, требаше да го следам неговиот чекор и да го направам истото. После тоа, се отиде по ѓаволите. Не дека немаше добри играчи во Интер, едноставно клупската атмосфера не беше добра. Во тоа време, Црвена Звезда беше многу подобро организирана од Интер, – вели Панчев во долгото интервју.
