Ако го обожавате мирисот на домашно тесто и неодоливи меки залачиња, овие панцероти се вистинскиот избор. Однадвор крцкави, однатре меки и сочни, благодарение на богатиот фил од шунка, кашкавал и домат. Омилени им се и на децата и на возрасните. Приготвувањето е едноставно, а резултатот е фантастичен – исто како од пекарница!
Состојки:
За тестото:
- 720 г меко брашно (плус уште малку за премесување и расучување)
- 1 лажица сол
- 10 г прашок за печиво
- 3 цели јајца
- 400 мл јогурт
- масло за пржење
За филот:
- 300 г шунка
- 150 г полутврд кашкавал што се топи
- 150 мл кечап со доматен сок
- малку оригано
Приготвување:
За тестото
Во поголем сад сипете 700 г брашно, сол и прашок за печиво, па добро промешајте. Додајте јајца и јогурт и соединете ги состојките. Месете додека добиете меко тесто. Ако е потребно, додајте уште околу 20 г брашно (зависи од големината на јајцата). Оставете го тестото да отстои додека го приготвувате филот.
За филот
Изрендајте шунка и кашкавал. Додајте кечап и посипете со оригано. Сето тоа добро соединете го. Смесата треба да биде влажна, но доволно густа за да не истекува при пржењето.
Формирање на панцеротите
Расучете тесто со дебелина од околу 5 мм. На растојание од 5 см од работ на тестото ставајте по една лажица од филот. Преклопете го тестото преку филот, па со помош на чинија притиснете и формирајте полукруг. Така формирајте ги сите панцероти додека имате тесто и фил. Остатокот од тестото повторно расучете го и повторете ја постапката. Ако снемате фил, може да пресечете само празно тесто – како мекици.
Пржење
Во подлабоко тавче загрејте масло на посилна температура. Пржете ги панцеротите додека добијат златно-кафена боја. Првата тура ќе се пржи побавно, а наредните побрзо, бидејќи маслото ќе биде добро загреано. Вадете ги на хартија за да се впијат вишокот маснотии.
Совет
Панцеротите се највкусни додека се топли, но меки се и кога ќе се оладат. Одлично одат со чаша јогурт или кефир.
