Итна потрага е во тек во Западна Австралија откако исчезна мала капсула со радиоактивна супстанција, објави Би-Би-Си. Капсулата содржи мала количина на радиоактивен цезиум-137, кој може да предизвика сериозни здравствени последици доколку се допре.
Беше изгубен помеѓу градовите Њуман и Перт во средината на јануари – на растојание од приближно 1.400 километри, а јавноста беше предупредена да се држи подалеку од капсулата доколку ја види.
Предметот се транспортирал со камион помеѓу рудникот северно од Њуман во регионот Пилбара и североисточните делови на Перт помеѓу 10 и 16 јануари кога бил изгубен. Цезиум-137 е супстанца која најчесто се користи во рударските операции.
Одделот за противпожарна и итна помош (DFES) објави илустрација на капсулата, која има димензии 6×8 mm, истакнувајќи дека капсулата не може да се користи како оружје, но може да предизвика изгореници од радијација и да има други долгорочни ризици како што е ракот.
Д-р Ендрју Робертсон, главен здравствен директор во Западна Австралија и претседател на Советот за радиологија, рече дека капсулата емитувала „разумна“ количина на зрачење.
„Нашата грижа е некој да го земе, не знаејќи што е“, рече тој и додаде дека можно е некој да го задржи или да го подари некому, доколку предметот му изгледа интересен.
Пребарувани се локациите каде што почнал и завршил транспортот и во тек се напори да се утврди точната траса, како и постојките меѓу двете точки, за да се стесни полето за пребарување, јави Танјуг.
Властите побараа секој што ќе ја види капсулата да се јави во Одделот за противпожарна и итна помош и да побара итна медицинска помош доколку се сомнева дека стапил во контакт со неа.
