По најавата дека Бугари и од Македонија и од Бугарија се подготвуваат на роденденот на македонскиот револуционер Гоце Делчев, 4 февруари, да допатуваат на неговиот гроб во Скопје, се јави и Александар Пандов од ВМРО-ДПМНЕ кој рече дека уште од утринските часови Македонци ќе бидат во црквата „Свети Спас“.
„Слушам дека разни негатори и бугарски инсталации се спремаат да положат цвеќе на гробот на Гоце Делчев на 4 февруари. Јас и Патриотскиот институт на ВМРО ќе бидеме таму од раните утрински часови затоа што Гоце е Македонија, а Македонија е Гоце. Почитувајте го Гоце како Македонец роден во Македонија и никако поинаку“, напиша Пандов на својот фејсбук-профил.
И Светскиот македонски конгрес апелира на масовно присуство на Македонците на 4 февруари во македонската православна црква „Свети Спас“.
СМК ги поддржува сите Македонци кои околу црквата „Свети Спас“ ќе се собираат од 3 февруари.
Поради најави за нарушување на јавниот ред и мир, СМК бара МВР да ги преземе сите мерки до забрана за влез во Македонија на организаторите – бугарската фондација „Македонија“, имајќи предвид дека Виктор Стојанов јавно се фали по социјалните мрежи дека во Скопје организирал воена обука, дека дава по 30 евра на деца во Македонија да учат бугарски јазик, литература и историја на он-лајн училишта, дека низ Скопје негови членови залепиле 10.000 налепници на кои пишува дека сме биле еден народ со Бугарите, дека упатуваше закани за физичка ликвидација на претседателката на комисијата за спречување и заштита од дискриминација…
