Познатата водителка Опра Винфри одговори на децениските критики упатени на нејзина сметка, поради тоа што им даде медиумска платформа на Фил Мекгроу познат како Д-р Фил и Мехмет Оз понат како Д-р Оз, кои подоцна станаа влијателни ТВ-личности и политички активни фигури. Во интервју за „Еми магазин“, 72-годишната Винфри ги објасни причините зошто првично ги ангажирала во нејзиното популарно шоу, пишува „Пипл“.
Винфри го запознала Д-р Фил за време на судски процес во 1998 година каде тој ѝ помогнал како советник.
„Беше толку практичен, приземен и реален. Сметав дека може да им помогне на многу луѓе“, изјави таа.
Додека пак, за Д-р Оз изјави дека нејзината пријателка Гејл Кинг ги запознала во 2004 година.
„Објаснуваше медицински работи на едноставен начин што ми беше корисен, па помислив дека ќе им користи и на другите“.
Опра нагласи дека нејзините тогашни намери биле исклучиво водени од желбата да сподели корисни информации со публиката, но се огради од нивните денешни политички ставови:
„Секој има свој пат во животот и тоа нема никаква врска со мене, ниту пак јас имам некаква врска со нив. Луѓето ме критикуваат за нивните ставови и политика, но во тоа време мојата намера беше едноставна“, изјави Опра.
Двајцата лекари, кои подоцна добија свои сопствени емисии поддржани од нејзината продукција, во последниве години се познати како поддржувачи на Доналд Трамп и извршуваат повеќе јавни функции во неговата администрација.
Во истото интервју, Опра се осврна и на коментарите за нејзиното богатство, истакнувајќи дека нејзиното шоу било вистинска мисија, а не само бизнис.
Таа откри дека успеала да изгради империја благодарение на тоа што верувала во сопствениот проект иако машките менаџери во индустријата не очекувале толкав успех, овозможувајќи ѝ постепено да го зголеми својот удел во шоуто од 35 отсто на дури 92 отсто.
