Грчката суперѕвезда Јанис Адетокумпо дојде на еден поен од личниот рекорд, но тоа не му помогна на Милвоки да ја победи Индијана на гостински терен.
Пејсерс славеа со 126-124 и покрај фантастичното издание на јанис кој заврши со 54 поени, а имаше и 12 скока и 3 асистенции. Од игра шутираше 19/25, но последниот кош го постигна на пет минути пред крајот. Бакс испуштија предност од 10 разлика, а во клучните моменти, кога се одлучуваше победникот имаше две загубени топки и една лична грешка над Халибартон по што Индијана поведе со 124-121.
Бакс со ова ја прекинаа серијата од три победи, но и го претрпеа третиот пораз во досегашниот дел од сезоната. За Индијана, пак, ова беше трет триумф по ред. Зад Адетокумпо кој седми пат во кариерата постигна 50 или повеќе поени, остана Крис Мидлтон со 19 поени, додека кај Индијана, најефикасен беше Халибартон со 29 поени, 10 асистенции и 6 скока.
Во вториот натпревар од ноќешната програма, Атланта како гостин го победи Орландо со 120-119. Прва ѕвезда на мечот беше Тре Јанг со 41 поен.