Крокодил каснал Австралиец за глава додека тој нуркал во морето во северен Квинсленд. Нуркачот успеал да го преживее нападот отворајќи ја устата на животното и повлекувајќи го за главата, пренесува „Си-Ен-Ен“.

Маркус Мекгован нуркал со сопругата и група пријатели во близина на оддалечен остров кога сфатил дека некаква „вилица го каснала главата“. Отпрвин мислел дека е ајкула, но кога ја допрел сфатил дека се работи за крокодил.

„Успеав да му ја отворам вилицата и да му ја повлечам главата. Крокодилот повторно се обиде да ме зграби, но јас го оттурнав”, изјавил вчера Мекгован.

Австралиецот бил пренесен со хеликоптер во болница со исеченици по главата и рацете.

„Едноставно бев на погрешно место во погрешно време. Мило ми е што бев јас, а ниту едно од децата или дамата во групата“, рече тој, додавајќи дека му се чини дека се работи за млад крокодил.

Крокодилите кои живеат во морето можат да пораснат и до шест метри и тежат до 1000 килограми. Во Австралија има околу 100.000 морски крокодили.