Денвер успешно го положи првиот испит по ерата на Мајк Мелоун во успешната американска франшиза, односно стартуваше со победа во новата ера во која предводник на тимот ќе биде Дејвид Аделман.
Нагетси беа поуспешни од Сакраменто со 124:116 во натпревар во кој Јокиќ запиша трипл-дабл со 20 поени, 12 скокови и 11 аситенции, но во неколку наврати Србинот го привлече вниманието и поради влијанието кое го имаше на клупата.
Првиот меч без Мелоун на клупата мина во знакот на искусниот Јокиќ, кој во неколку наврати си даде за право да биде погласен од Аделман и практично да го има главниот збор на тајм-аутите.
Јокиќ им црташе накции на своите соиграчи со таблата во раце и се обидуваше да го извади најдоброто од нив, а со оглед на победата која беше оставрена, на крајот успеа во својата намера.
За крај, Јокиќ имаше јасна порака и до сите оние кои се сомневаат во квалитетот на Денвер оваа сезона, најавувајќи дека тренерската смена може да предизвика „будење на ѕверот“.
– Сите велат дека сме ранливи. Сепак ѕверот е најопасен кога е ранет. Мислам дека ѕверот повторно се разбуди, – порача најголемата ѕвезда на Нагетси.





