Фудбалските репрезентации на Нигерија и Брегот на Слоновата коска ќе играат во финалето на Африканскиот куп на нации.
Во првото полуфинале Нигерија ја елиминираше Јужна Африка по пенал серијата со 4:2, откако во регуларниот дел и продолженијата резултатот беше 1:1.
Мируваа мрежите во првото полувреме, во 67 минута Нигерија водеше со голот на Троост-Еконг, а израмни Мокоена од белата точка во 90 минута. Претходно во 85 минута им беше поништен гол на нигериските репрезентативци бидејќи Осимен беше во офсајд после ВАР снимката.
Во 115 минута во редовите на Јужна Африка црвен картон доби Кекана. Во пенал серијата кај Јужноафриканците непрецизни беа Мокоена и Макгопа, а на спротивната страна единствено не реализираше Аина.
Во вториот полуфинален меч Брегот на Слоновата коска со погодокот на Але во 65 минута по асистенцијата на Градел триумфираше над Д.Р. Конго.
Натпреварот за титулата ќе се игра в недела, а мечот за третото место е во сабота.