Во јавноста се појави ексклузивна, досега необјавена изјава на премиерот Христијан Мицкоски дадена за британската телевизија „Sky News“, која отвора сериозни прашања за ставот на македонската Влада околу можноста за сместување на мигранти во Македонија по барање од Велика Британија.
Иако јавноста досега не беше информирана, според достапните информации, британската страна, предводена од премиерот Кир Стармер, упатила барање за разгледување на опција за формирање мигрантски кампови надвор од границите на Обединетото Кралство, при што Македонија била спомната како потенцијална локација.
Мицкоски, на прашање од британските новинари, не одговорил со јасно „не“ на идејата, туку, како што се тврди, дал дипломатски одговор без конкретен став. Ова предизвикува загриженост кај дел од јавноста, особено поради тоа што ниту Владата, ниту македонските медиуми досега не ја објавија оваа изјава.
Дополнително, се поставува прашањето зошто премиерот не ја информирал домашната јавност за оваа комуникација со британската страна и дали навистина постои план или договор во најава за воспоставување кампови на македонска територија.
Во отсуство на официјален став од Владата, прашањето останува отворено: дали Македонија е подготвена да стане дел од нова стратегија на Велика Британија за справување со илегалната миграција преку кампови во трети земји?
Од Владата сè уште нема официјална реакција по повод оваа објава, додека опозициските партии веќе најавуваат барање за итни појаснувања во Собранието.
