Од МВР вчера информираа дека личните карти со називот на државата „РЕПУБЛИКА МАКЕДОНИЈА“ кои имаат важност, односно чиј рок не е истечен, продолжуваат да важат и по 12-ти февруари..Ќе можат да се користат на шалтери, во банки, а со нив ќе може да се гласа и на избори.
Казни, како што велат од МВР, нема да има.
Министерството за надворешни работи не гледа можност како може да се продолжи важењето на пасошите и по 12 февруари.
И додека претседателот и премиерот јавно си префрлаа кој треба да се јави кај грчките колеги за да се продолжи рокот за промена на пасошите, од Министерството за надворешни со порака да не им се дава лажна надеж на граѓаните дека може да се одложи рокот.
„Наместо да се концентрираме на давање на лажна надеж на граѓаните дека ќе ги смениме одредбите од Преспанскиот договор и ќе го смениме Законот за спроведување на уставните амандмани, да се забрза издавањето пасоши, да почнат налепниците да се лепат на регистарските таблички. Ова е обврска што се провлекува пет години и да се обидеме до 13 февруари максимално да ги средиме документите на граѓаните“, велат од МНР.
Од 5ти јули 2021 година до синоќа, издадени се над милион и педесет илјади лични карти, нешто над милион и двесте илјади пасоши како и 546 илјади и 741-на возачка дозвола. Со тоа во државниот буџет се слеале нешто над пет милиони евра само за личните карти, пари од граѓаните..
