На аеродромот во австралискиот град Канбера во средата, една жена е снимена како трча по пистата и застанува пред авионот Ербас А320 на „QantasLink“. Во еден момент почнува да му мавта на изненадениот екипаж на авионот кој штотуку се подготвувал за полетување.
Сведоците велат дека жената очигледно доцнела на својот лет за Аделаида и затоа му мавтала на пилотот. Се чини дека со оглед на тоа што стоела под десната врата од авионот, се надевала дека ќе се отвори. Еден од сведоците, го опишал настанот како „благ хаос“, пренесува „NZHerald“.
Други наведуваат дека е „среќа што пилотот бил предупреден за тоа што се случува или тој сам го видел и го исклучил моторот на авионот“. Сведоци од авионот навеле дека патничката „очигледно го пропуштила летот и решила дека сепак може да го фати“.
Тие опишале како таа „се протнала покрај персоналот на излезот, истрчала на пистата и стигнала до авионот“. Сите биле изненадени што патничката стигнала толку далеку на пистата без никој да ја запре. Летовите на аеродромот биле прекинати 10 минути пред да се вратат во нормала.
Жената не смеела да се качи во авионот кој полетал без неа. Таа била уапсена и обвинета за трчање на пистата и загрозување на себеси и другите. Портпаролот на австралиската федерална полиција изјавил дека на жената и била одбиена кауција. Се очекува да биде изведена пред суд во петок.