Момче е уапсено под сомнение за убиство на 78-годишна жена во селото Челопек, соопшти Министерството за внатрешни работи.
Според информациите од полицијата, 25-годишниот Т.Б. од селото Малотино бил уапсен на 13 февруари околу 19:30 часот во селото Драгоманце, поради сомнение дека сторил кривично дело „убиство“.
МВР наведува дека осомничениот се сомничи дека претходниот ден, на 12 февруари, во домот на жртвата физички ја нападнал 78-годишната М.С. од селото Челопек, по што ја задушил со перница, при што таа починала на самото место.
Покрај убиството, полицијата го сомничи Т.Б. и за повеќе тешки кражби извршени во неколку села на подрачјето на општина Старо Нагоричане.
За случајот е известен надлежен јавен обвинител, а осомничениот е задржан во полициска станица. По целосно документирање на настанот, против него ќе биде поднесена соодветна кривична пријава.
