Државно-црковната делегација предводена од претседателот на Собранието Африм Гаши денеска во базиликата „Сан Клементе“ во Рим ќе присуствува на молебен на гробот на свети Кирил по повод чествувањето на Денот на сесловенските просветители 24 Мај.
Со молебенот ќе чиноначалствува архиепископот охридски и македонски г.г. Стефан, заедно со митрополитите на Европската и на Дебарско-кичевската епархија, г. Пимен и г. Георгиј, и свештеници од Македонската православна црква – Охридска архиепископија.
Македонската делегација ќе ја посети и папската базилика „Санта Марија Маџоре“ каде што претседателот Гаши ќе положи венец на спомен-плочата напишана на македонски јазик. Таа е поставена во 2015 година како благодарност од македонскиот народ за гестот на папата Адријан Втори, кој во 868 година, во оваа базилика ги осветил словенските книги што во Рим ги донеле браќата Константин (Кирил) и Методиј. Во базиликата „Санта Марија Маџоре“ делегацијата ќе го посети и гробот на папата Франциск, кој почина минатата година.
По Моравската мисија и воведувањето на новата азбука – глаголицата, Константин Филозоф (подоцна Кирил) стигнал на папскиот двор за да го одбрани словенскиот јазик и писмо од нападите на т.н. тријазичници, кои тврделе дека само латинскиот, грчкиот и еврејскиот се свети јазици со кои може да се богослужи. Во Светата Столица била отслужена богослужба на словенски јазик, така што по Цариград, и Рим официјално го признал словенскиот јазик за рамноправен со другите. Константин во Рим стапил во калуѓерски ред и го добил монашкото име Кирил. Таму и починал на 14 февруари 869 година и неговиот гроб е во базиликата „Св. Климент“ (Сан Клементе), посветена на папата Климент Први.
Браќата св. Кирил и Методиј се чествуваат со разни манифестации, а централно место има поклонението на гробот на св. Кирил во Рим. Првпат е организирано во 1969 година за 1100 години од смртта на свети Кирил, и оттогаш секоја година на 24 мај се одбележува со највисоки почести од црковно-државна делегација.
Годинава чествувањето го организира Собранието на Македонија и делегацијата ја предводи неговиот претседател Африм Гаши. Во неа се и координаторите на пратеничките групи на ВМРО-ДПМНЕ, СДСМ и Вреди, Никола Мицевски, Оливер Спсовски и Беким Ќоку и пратеникот од ЗНАМ Даниел Стојчевски.
Во рамки на престојот во Италија, Гаши вчера имаше аудиенција кај папатата Лав XIV и средба со Пјетро Паролин, државен секретар на Светата Столица. За медиумите изјави дека односите со Ватикан се беспрекорни и оти клучни столба на кои се темелат се Кирил и Методиј и Мајка Тереза.
Од двете страни беше истакнато дека релациите помеѓу нашите две држави се беспрекорни, на највисоко можно ниво, и гледаме можност како во иднина да ги подобриме и зацврстиме овие односи. Секако, напоменавме дека двата клучни столба на нашите релации се засноваат на чествувањето на светите Кирил и Методиј, а исто така и со Мајка Тереза, како една од личностите кои ги поврзуваат овие две престолнини, истакна Гаши.
