Првата дама на Соединетите Американски Држави, Меланија Трамп, објави дека лансира своја филмска продукциска компанија наречена „Мјуз филмс“.
Веста доаѓа неколку месеци пред премиерата на документарецот на „Амазон студиос“, кој наводно вреди 40 милиони долари. Таа ги презентираше информациите дискретно преку 10-секунден клип на својот официјален профил на Икс, пренесува „Ју-ес-еј тудеј“.
„Ви ја претставуваме: Мјуз филмс – мојата нова продукциска компанија. Филмот ‘Меланија’ ексклузивно во кината низ целиот свет од 30 јануари 2026 година“, напиша таа во објавата.
Името на продукциската компанија директно се однесува на нејзиното кодно име на Тајната служба – „Мјуз“.
Заедно со најавата за новата бизнис иницијатива, Меланија ги потсети своите следбеници дека документарецот „Меланија“ ќе има премиера во кината низ целиот свет на 30 јануари 2026 година.
Дискретниот тон на најавата отстапува од вообичаениот пристап на семејството Трамп, кое ги најавува своите проекти со значително медиумско внимание.
Според американските медиуми, на пазарот моментално има две продуцентски компании со исто име. Постои една европска подружница на „Амазон“ и една американска компанија позната по филмовите „Самоубиствата на девиците“, „Американски психо“ и „Пролетни одмори“. Не е познато дали „Мјуз филмс“ на Меланија Трамп ќе биде поврзана со нив или ќе работат целосно независно.
Првиот и досега единствен потврден проект на новата куќа е документарецот „Меланија“. Договорот за овој филм е склучен непосредно пред почетокот на вториот мандат на претседателот Трамп, околу времето кога основачот на „Амазон“, Џеф Безос, присуствуваше на инаугурацијата.
Според соопштението на студиото, филмот носи „невиден пристап до 20-те дена пред претседателската инаугурација во 2025 година, низ очите на Меланија Трамп“.
Публиката ќе ја следи Меланија додека ги организира подготовките за инаугурацијата, се справува со сложеноста на транзицијата во Белата куќа и се враќа во јавниот живот со своето семејство. Филмот вклучува ексклузивни снимки од клучни состаноци, приватни разговори и локации што никогаш порано не биле видени.
Договорот со „Амазон“, исто така, вклучува право на дистрибуција на серија од повеќе дела што ќе следи по документарецот.
Режисерот на филмот е Брет Ратнер, за кого ова е прв ангажман откако неколку жени, меѓу кои и Оливија Ман и Наташа Хенстриџ, го обвинија за сексуален напад. Ратнер ги негираше сите обвинувања.
