Американската актерка Мег Рајан беше одликувана со наградата „Почесно срце на Сараево“, во рамки на 30. издание на Сараевскиот филмски фестивал, за нејзиниот исклучителен придонес во филмската уметност.
Рајан одржа мастерклас под модерација на наградуваниот режисер од БиХ, Данис Тановиќ, добитник на Оскар за филмот „Ничија земја“. Мастеркласот беше посебна можност да се добие увид во клучните аспекти на кариерата на Мег Рајан и нејзиниот нов филм „Што се случува подоцна“ („What Happens Later“), кој исто така ќе биде прикажан на фестивалот.
Инаку станува збор за романтична комедија, која Рајан ја режисираше и напиша, а воедно и глуми во неа заедно со актерот Дејвид Духовни.
Холивудската ѕвезда прошета на црвениот тепих во Сараево, каде позираше со директорот на фестивалот, Јован Марјановиќ, и го привлече вниманието со своето интересно издание.
Рајан се појави во сив фустан со класичен крој, а комбинацијата ја комплетираше со црни чевли и очила.
Таа со широка насмевка им позираше на фотографите и им потпиша неколку автограми на обожавателите.
